Stefka 2
Stefka 2


W Szczygłowicach w 1995 roku rechtorka Stefania Grzegorzyca założyła dzieciyncy zespoł, w kerym zaczli śpiywać ślonski śpiywki i tańczyć. Sama z poroma matkami tych bajtli zaczły szyć stroje ślonskie i prowadziła próby, kere niyroz jom nerwow kosztowały, ale dzisioj już żodyn o tym niy wspomino. Zespoł nazwali Wrazidloki i lepij trefić niy umieli, bo nazwa tak sie wszystkim spodobała, że coroz wiyncyj dziecek chciało zostać tym Wrazidlokiym. Zaczły sie wystympy, nojprzod na rostolicznych akadymiach szkolnych, aż w końcu znali ich niy yno w Knurowie i Szczygłowicach. Zaproszali Wrazidlokow coroz to kaj indzi, a łone żodnymu niy odmowiali i wszystkich poradzili ujońć za serce swojim piyknym śpiywaniym i tańczyniym. Dzisioj znani som niy yno na cołkim Ślonsku, ale tyż za granicom. Koncerty Wrazidlokow prziciongajom moc ludzi, kerym bliskie sercu ślonski śpiywanie. Co roku tyż jedne dzieci, kere kończom szkoła, opuszczajom zespoł, i trza zaś nowe, młodsze dziecka szkolić.15 października był żech zaproszony na jubileuszowy koncert przez kamratka Stefka, z kerom sie znomy od 1996 roku, kiedy została ona laureatkom konkursu „Po naszymu, czyli po ślonsku”, tak jak jo i teraz dość czynsto sie trefiomy na spotkaniach klubu „Czelodka po naszymu”. Tyn koncert byda długo pamiyntoł. Dziecka tak piyknie na te swoji dziesiynciolecie zaśpiywały i tańczyły, że niy idzie tego opisać. Nawet mi sie płaczki w ślypiach pokozały i niy yno mie, jak zaśpiywały „Ojcowski dom”.Było doprowdy piyknie i po naszymu. A jak zadowolono była Stefka ze swojich podopiecznych, widać na fotce, kero żech i zrobiył, jak zaglondała na swojich Wrazidlokow.UTOPEK

Komentarze

Dodaj komentarz