Mōj kamrat Jōnek już doś pora lot robiył we MOK-u. Tam dycki ôrganizowali roztōmańte kulturalne imprezy, a na Dziyń Kobiyt za tych starych, dobrych czasōw były aże trzi tury, to Jōnek dō dōm nigdy przed pōłnocōm niy prziszoł! Już jak szeł rano do roboty, to w dōma dycki bōła zwada, bo Emilka, jego baba, fest przezywała, że do cudzych babōw, to Jōnek mo czas, yno do ni mu go sztyjc brakuje! Bezto niyskoro we wieczōr Jōnek właziōł do izby „na paluszkach”, coby Emilki niy ôbudzić! A rano jeszcze sie dobrze niy wyspoł, a roztōmiło babeczka już mu nad łebōm brniała a lewity czytała! I tak szło do ôbiadu, a potym były „ciche godziny” aże do wieczora.
Łōńskigo roku Jōnek wziōn sie jednako za te świyntowani troszka inakszy. Kupiył Emilce dwa bilety do kina na jakiś ôgrōmnie piykny
a rōmantyczny film, a padoł, coby sie tam wybrała ze swojōm nojlepszōm kamratkōm. Emilka bilety przijyna, ale zamias ze kamratkōm zamiarowała iś do kina ze swojōm mamulkōm, co ji Jōnek ani fest niy przoł, bo sztyjc Emilki na niygo husowała! Jednako ze tych planōw nic niy wyszło, bo przijechała ku nim Jōnkowo mamulka i baby se wyrychtowały taki prawy Dziyń Kobiyt jak za starych czasōw! Kupiyły se dorta a dwie flaszki grōnowego wina. Śpiywały a tańcowały aż do wieczora a jeszcze pora sōmsiadkōw ś nimi! Spać sie pokładły dziepiyro przed pōłnocōm. Emilka ze swojōm mamulkōm poszły spać do izby ôd dziecek, co wtynczos były na szkolnyj wycieczce, a Jōnkowo mamulka lygła se do Emilczynego łōżka, bo chciała mieć wyżyj pod gowōm. Tyn roz Jōnek sie postawiył a kupił jeszcze Emilce piykno żōłto rōza na zgoda, ale ôstoł mu ś ni yno sztyngel! Wloz do izby po cimoku i pożgoł tym sztynglym swoja mamulka, co tam spała. Baba skoczyła na rowne nogi chyciyła szklōnka, co w ni plywoł jeji gybis, a gichła ś ni na tego czornego straszka, co jōm napasztowoł! Zaroz doł sie słyszeć ôkropny ryk a potym jamrowani: Moji ôczy, moji ôczy! Trza bōło zawiyź Jōnka do ôkulisty, coby mu ôczōw niy wyparziło!. We cołkim familoku niy bōło ani jednego czyrstwego chopa, dziepiyro jedyn modziok, co mioł prawko ôd trzech dni go tam zawiōz.
Tyn roz ôstudy we chałpie niy bōło, bo wszyjski baby Jōnka ôbskakowały, a ôn bez trzi dni fest chorego udowoł!
Komentarze