Eli sōm jeszcze babski roboty?

A ô babach to godali inakszy:”Baba sie po to rodziyła, coby po chałpie chodziyła”, a wszyjstek, co we chałpie bōło do roboty: prani, warzyni, gowiydź, bydło, a dziecka, to do ni noleżało. A jeszcze musiała zrobić jedna rzecz, co ji żodyn chop zrobić niy poradzi – porodzić te wszyjski dziecka, co se se ze chopym zesztelowali! Jo se myśla, że jednako to te chopy mieli ta robota lekszo, bo jak chop do dōm prziszoł, to chcioł mieć wszystek narychtowane, a niy wadziło mu to, że jego baba na ôstatnich nogach musiała wele niygo skokać! Zaroz sie ôdezwiōm chopski głosy, że to ôni mieli dycki gorzi, bo jich do wojny brali, a babōw niy! Na tym tymat niy byda dyskusyje robić, ale jedna rzecz powiym, eli sie Wōm to widzi abo niy: To bōło isto skuli tego, coby we wojsku porzōndek bōł! Bo co to je za wojok, co miast sie bić ze wrogami, za babskim zadkiym sie ôglōndo?
Teroz wiela sie pomiyniyło! Mode baby wolom iś do roboty niż ze dzieckami w doma siedzieć. A majōm ta przileżitoś, bo wiela tych szkōłkōw a żlōbkōw nastawiali. Idzie tam bajtla dać na pora godzin, a tam już ô naszygo „liblinga” zadbajōm jako potrza. Bezto baba może iś do roboty do biōra, abo kaj do fyrmy ku maszynie. Ale po po robocie modo mamulka zaś musi sie zaprzōngnōnć do tego gepla we chałpie. To sōm te wszyjski babski roboty, co chopy niy radzi do nich rynka przikłodajōm! Nikery chopeczek woli se siednōnć przed telewizōr, bo musi se dychnōnć po robocie, ale sōm tyż tacy, co radzi swoji babie pōmōgōm. Poradzōm ciepło wieczerzo nawarzić, prani na sznōrki powiyszać we łaziynce, dziecka zabawić, a we wieczōr jich ôkompać, malikowi dupka utrzić, a pielucha mu zmiynić, abo mlyka mu nawarzić! Jako widzicie, te roboty, co sie downi poważowało za „babski” zrobiły sie taki do kożdego, co mo wtynczos kwilka frajnego czasu, bo dziecka a familijo sōm tyż ôd tatulka, niy yno ôd mamulki, co sie czynsto tyż „chopskich” robotōw chytać musi, a pōmōgo mu na ta familijno gospodarka zarobić!
Jo se myśla, że jednako dali bydōm taki roboty, co ich zrobić bydōm mogli yno chopy abo yno baby, a kere to sōm, to se pomyślcie już sami!

Komentarze

Dodaj komentarz