Niy chodź we pojedynka we Wilijo po wieczerzi

Jedyn chop, co go fest morziło po makōwkach sōm polecioł do wychodka, a kwila posiedzioł na desce. Dźwiyrzi niy zawrził, bo wiedzioł, że go tam we tako noc żodyn niy trefi. Bezto mōg dać pozōr co sie dzioło na jego placu. A tam ôd ôkna do ôkna lotała tako bioło starka ze kosōm! Mioł szczyńści, że go niy wywōniała, boby go zaroz ze sobōm wziyna! Ôn wyloz ze hajźla dziepiyro, jak ta Śmiertka do sōmsiadōw poszła, a drabko cis do izby! Ô wszyjskim padoł swoji familiji dziepiyro na drugi dziyń, bo sie boł, że tōm godkōm Kostucha do chałpy nazod prziwoło. Inkszy chop godoł, co we wilijny wieczōr widzioł na swojim placu połno cudzych wojokōw. Dziepiyro starzik ôd sōmsiadōw mu padoł, co za wojny „zibcich–ejnonzibcich”, tam wojsko sztacjōnōwało i jak francusko kanōna dmuchła, to zaroz pora chopōw zabiyło, ale eli ich kaj po blisku niy pochowali, tego starzik niy wiedzioł?! Nasza ciotka Tekla godali, co kejś sōmsiadowo maluśko cera uwidziała na placu swojigo starzika, co umrził dwa roki nazod. Dziołszka mu fest przoła, a chciała go pytać do dōm na wieczerzo, ale na to szczyńści wylazła starka a ji zakozała taki gupoty robić! Leko je ducha napytać, ale potym sie go pozbyć niy idzie, bo ôn sōm niy pōndzie!
Jak kaj do parafije bōło daleko, to ludzie chodziyli kupōm na pastyrka. Zbiyrali sie we pojstrzodku wsie, a potym społu deptali do kościoła, ze śpiywym a graniym. Robiyli tela larma, coby niy yno wilki ôdegnać, ale tyż coby sie ku nim niy prziłōnczyły jaki złe duchy, co po krzach przi drōdze we Wilijo wystowały! Bezmała nikerzi ich widzieli na swoji ôczy. Nojwiyncy takich straszkōw bōło dycki wele stawōw a we lesie! Jak ludziska szli nazōd, to sie już tak boć niy musieli, bo szła ś nimi Świynto Rodzina, co chciała wszyjskich parafianōw nawiydzić! Bezto ludzie zanim sie wele swoji chałpy ze inkszymi rozłōnczyli , to chociaż jeszcze jedna „zdrowaśka” zerzykali, a potym se życzyli Błogosławiyństwa Bożego a wesołych Świąt!
A jo Wōm tyż ze serca szczyrego życza tego samego!

Komentarze

Dodaj komentarz