Czym sie rżni feszter d chrabnszcza? / Grymlino
Czym sie rżni feszter d chrabnszcza? / Grymlino

Je tyż jedna zorta tych fesztrōw, co ich za dnia we lesie niy uświodczycie. Ci iści idōm do lasa, jak je ciymno noc. Ano, to sōm rabczyki! Na tych to se te nōrmalne fesztry musieli dycki dać pozōr! Rabczyki isto znali las lepi jako ôni, bo im czynsto uciykli ze zabitōm zwierzinōm, abo jōm kaj we lesie tak dobrze skowali, że ani te myśliwski psi sie niy kapły, a jōm niy wywōniały! Tak widzicie ludeczkowie roztōmili, że na wszyjstek sōm metody a knify, ale żodyn rabczyk ich drugimu niy zdradziył.
Mōj tatulek po podstawowej szkole tyż dostoł robota we lesie. Ze robotnikami sadziył nowe strōmiki: małe dymby, świyrczki, ale nojwiyncy to we Baranioku sadziło sie sośniczki. Bo taki strōm gibko rośnie. Jednako drzewo mo fest miynki i już skuli tego chałpy ś niego niy do sie postawić, a na masty to sie tyż bezto niy nadōwo, ale na papiōr to abo na kołki to je w sōm roz!
Dycki we lesie bōło cicho, ale co jakiś czos robiyli tam gōny. Wtynczos do lasa prziszli myśliwce (to ni ma to samo, co fesztry!). Bōło wtynczos larma, butlu, szczekanio psōw strzylanio, huku, trzasku a wrzasku, a na kōniec dycki tyn gōn głośno ôdtrōmbili, do każdego zabitego zwiyrza ôsobno! Nojprzōd szły dycki te wielgi, masne sztuki: jelynie, sarny, daniele, dziki świnie, a ku kōńcowi prziszoł czas na zajōnce, co powiōnzane we paczki leżały. Tym to sie grało tak: Wszyjski zajōnce do kupy, do kupy, wy stare dupy, wy stare dupy… I jo ta śpiywka znałach już, jak mi bōło sześ lot! Jak myśliwce troszka popili na starzikowych urodzinach, to mnie dycki egzaminowali, a potym dostowałach piykno nagroda! Roz żech padała starzikowi, coby czynści te urodziny robiył!
A terozki my prziszłi na koniec ku tyj zagadce, co je we tytule. Co? Wiycie już jako je ta rōżnica? Spomnijcie se, jako wyglōndo tym chrobok a jako feszter? Chrobok je brōnotny, a na zielono sro, a ze fesztrym je cołkiym na łopy: na zielono sie łoblyko ( po darmo go zielōnka niy przezywajōm), a na brōnotno, to sami wiycie co! Tym feszterskim szpasym kōńcza swoja godka na dzisio!

2

Komentarze

  • Grymlino. Do chopa ze Żorów 04 czerwca 2018 18:11Jo tyż panoczku pamiyntom, że łod tego rynczyska śmierdziały! Moja jedna znajomo, co sie ze chałpy Moj mianowała, robiyła se szpasy, że chrabonszcze to som jeji przociele, bo im mojki nikerzi godajom. Ale u nos w doma, starzi i modzi godali chrabonszcze. Mojiki to my godali na taki zielone wiyrszki ze świyrka abo ze sosny, co śnich starka taki miodek na kaszel robiyła. Jak sie te wiyrszki urywało we lesie, to szło sztrofa zapłacić.
  • Chop ze Żorów tyn artykuł 02 czerwca 2018 18:41U nos na te myńsze majowe chrabonszcze godali tyż mojiki, abo majowe chroboki. Dziecka ich chytali a potym im rynce śmierdziały.

Dodaj komentarz