Dziyń Ziymie / Grymlino
Dziyń Ziymie / Grymlino

Eli ta nasza Ziymiczka rychtik żyje, jako to nikerzi godajōm? Jo se myśla, że ja, ale my jednako na to za mało zważōmy! Zdo sie nōm, że Ziymia je już downo ze wiyrchu zimno, ale we pojstrzōdku sie w ni porzad warzi a miele! Wybuchajōm wulkany a je ich na świecie wiela, bo cołko ta twardo szkorupa yno pływie po morzu ôgnia. Ciepło woda ze Ziymie ciecze, a czasym strzylo wysoko, jakby sie na nos wkurzała, a popluć nos chciała, jako to czasym robiōm małe bajtle. Morsko woda tyż porzad sie ruszo a płynie ze jednego kōńca na drugi, a to wszystek skuli tego, że sie ziymia ôbraco. I tak by my se mogli godać a udowodniać jedym drugimu. Teroz dōm Wōm jeszcze jedyn przikłod, że ta nasza planeta porzad żyje, chociaż je już fest staro. Jak co stawiomy, to muszymy ta skōra ôd naszyj Ziymie naruszyć, bo wszyjstek, co na ziymi stoji, musi mieć grōnta, inakszy , by sie nōm te chałpy, co ich stawiać chcymy roz-dwa rozleciały, abo woda by ich spłōkała. Chałpy sie z czasym przewrocōm, ludzie ich rozbierōm, potym grōnta po nich ziymiōm a pioskym zasujōm i nic na wiyrchu niy widać, ale to nōm sie tak yno zdo. Tak tyż było we nimieckim mieście Mainz. Tam dwa tysiōnce lot nazōd sztacjonōwoł regimynt rzymskich wojokōw. Postawili se tam taki małe miasteczko, co mu Moguncja godali. Za jakiś czos sie Moguncja ze mapy straciyła i już ô ni stoło yno we starych kronikach. Jednako tak bez sto lot nazōd łodkryli jōm na nowo. Coż kej niy poradzili znojś tych basynōw na woda do picio, co we kożdym rzymskim mieście dycki bōły. Dziepiyro ich uwidzieli na fotogafijach, co zrobili ze wiyrchowiska – ze fligra! Nōm sie podropano skōra zagoji, a na Ziymi już zowdy ôstanōm ślady, jakby ji kery gymbulka podropoł! Isto mōm prawie, że nasza planeta żyje, a co Wy ô tym myślicie?

Komentarze

Dodaj komentarz