Sknd babo te godki bierecie / GRYMLINO
Sknd babo te godki bierecie / GRYMLINO

Jednako nojwyncy s tych wszyjskich godkōw napisoł sōm żywot. Moji kamratki mi porzad snoszōm nowe tymaty, a kożdo chciałaby być we naszyj gazecie ôpisano, coby mōgła wnukōm pokozać, że to je jeja historyjo. Nikedy musza sie ich pytać, jako to mōm ôpisać, bo jak napisza tak, jak to richtik było, to sie może potym kero gańbować! Ale ône sie dycki śmiejōm a godajōm: Czowiek mody bōł, to mioł prawo być gupi, niy?! Jo jednako mianami niy ciepia, a jak już tam jaki dōm, to możecie se pomyśleć, że to ni ma te prawe. Czasym do mie zwōniōm abo piszōm tyż nasi czytelnicy i dycki cosikej ciekawego pedzōm. Nikere rzeczy to mi sie samej przidarziły. Jedne były śmiyszne, inksze do rozpłaczu, ale żech ś nich nauki wyciōngła, bezto sie nimi teroz ze drugimi rada podziela. Kupa tych tymatōw na te godki prziniōśli mi tyż moji dziecka: nojprzōd ze szkoły, potym ze sztudyrowanio, a na kōniec ze swoji piyrszyj roboty. Wiela mi tyż połozprowiały moji znajome rechtōrki. Jo wiym, że to je ciynżki, ale tyż czasym i wesoły fach. Jedna rechtōrka, co już je downo na zasłużonej pynzyji, dycki godo tak: grōnt je, coby se swoji roboty niy ganić! Z resztōm we inkszych robotach tyż ni ma lepi! Nikaj cie niy posadzōm, a papinkōw jodać ci niy dajōm!
Na jedyn czos zaczło mi już tych naszych tymatōw brakować, bo mi sie zdało, żech wszyjstek już ôpisała i chciałach se dać s tym pisanym po naszymu pokōj. Jednako kejś przi sprzōntaniu biōrka znodłach jedyn stary heft, coch w nim te prziniysione tymaty dycki notowała. Jeszcze sie ich tam pora bōło, bezto pisza dali! Przedstowcie se, że to sie już dziesiōnty rok zaczyno, jak my sie skamraciyli, bezto roztōmili czytelnicy ze serca Wōm za wszyjstek dziynkuja.

Komentarze

Dodaj komentarz