Godki  bergmnach a Skarbniku / Grymlino
Godki bergmnach a Skarbniku / Grymlino

Starzik roztomańte rzeczy we tyj swoji robocie widzioł. Roz tyż nōm padoł, co Skarbnik mo swoji wojsko. To sōm we jednym miejscu myszy, a kaj indzi szczury, bo to musicie wiedzieć, że ta zwierzina na jednym miejscu społu niy żyje. Myszy sie szczurōw bojōm, bezto na grubie sōm jedne abo drugi! Starzik godoł, że jak ôn bōł już troszka starszy, a wōngel fedrowoł, to bergmōny mieli we przodku takigo fajnego szczura, co ku nim jeś przichodziył, a kożdy bergmōn dowoł mu po kōnszczyczku tego, co se na śniodani prziniōs. Chlyb tyż szczur zeżar, ale nojwiyncy to ôn przoł wōsztōm, a nojbardzi takim uwyndzōnym! Przedstowcie se, że tyn stwōr sie bergmōnōm jedyn roz ôdwdziynczył. Kejś wylecioł na pojstrzōdek chodnika, zaczōn sie kryncić a przewracać, jakby go krymfy brały, a jeszcze strasznie przi tym kwiczoł, cołkym jakby go zarzinali! Kej chopy usłyszeli taki larmo, to sie zaroz wszyjscy we tym miejscu zlecieli, a za nimi jak niy dmuchło, a kamiynie sie ze stropu posypały! Zawał sie zrobiył tam, kaj przed kwilōm robiyli. Na szczyńści wszyjscy przeżyli, yno starzik (wtynczos jeszcze mody chop) kōnskym kamiynio dostoł we kichol i ôd tego czasu mioł go krziwy! Jak sie kurz rozwioł, to jejich szczura już niy było, kajś sie straciył, a wiyncy sie już niy pokozoł. Bezto potym ludzie godali, że to musioł być sōm Skarbnik, bo ôn sie poradzi we praje kożdo zwierzina przemiynić, ale barankym abo gołymbiym nigdy niy bydzie! Jedni padali, że Skarbnik to je kamrat ôd bergmōna, a drudzy radzili, coby sie lepi ôd niego ze daleka trzimać, bo to je siyła niyczysto, a jak bydzie yno chcioł, to czowiekowi zaszkodzić poradzi. Niy darmo godało sie, że Skarbnik na jednyj nodze mo kopyto, a ślypia dycki po cimoku mu sie świycōm na czyrwiōno. Bezto Skarbnik musi mieć co spōlnego ze diobłym, a tego gizda, co chce ludzko duszyczka do piekła skludzić, trza sie dycki wystrzygać! Kamratczyn starzik nōm tego tela dycki nagodoł, ale jo była jeszcze bajtlym i nikerych rzeczy niy poradziyłach spokopić a spamiyntać. Możnej Wōm roztōmili sie tyż cosikej nowego spōmni, coście kejś za modu słyszeli, to dejcie mi znać. Wy mi to połozprowiocie, a jo se to zapisza.

Komentarze

Dodaj komentarz