Ôstatnimi czasy potrzebowałach szaty, co sie zapinajōm ze przodku, na całyj dugości. Ôblotałach wszyjski torgi we Żorach, sklepy, a potym ôbejrzałach wszyski żurnale, co nōm do dōm przichodzōm, a szatōw ni mōm do dzisio, isto tego sznitu już niy szyjōm! Ale dałach pozōr, że zaś prziszły nazōd do mody roztōmańte wkładki do dekoltōw a kragle, co udowajōm bluzki. To je możnej i praktyczne, ale czasym ôstudy a gańby poradzi narobić! Posuchejcie, co sie przidarziło bez 40 lot nazōd jednej kamratce ôd moji mamulki. Paniczka Byjata rychtowała sie na weseli we familiji. We wrześniu było jeszcze ciepło, ale niy tak jak bez lato i ôna se kupiyła ôgrōmnie modno wtynczos „garsōnka” to je taki łach, co sie skłodo ze dwōch tajlōw: prosto kecka na dōł, a na wiyrch – jakla bez podszywki! Jednako we dziyń weselo sie ôchłōdziyło i paniczka Byjata była we saku, bo coby iść we samej garsōnce było troszka za zima, a nic cieplyjszygo, a piyknego we szranku ni miała. Ôroz sie ji spômniało, że mo jednako jedna użyteczno rzecz, co jōm dostała pora lot nazod ôd ciotki ze Rajchu. To bōł taki kōnsek przodku ze bluzki ze kraglym, co był ze bioluśki korōnki. Jak go Byjatka do tej garsōnki wsadziyła, to rychtik to sztimowało, a ôgrōmnie piykne było! Wszystek by było dobrze, bo sie to babōm na weselu fest widziało, ale kole połednia sie rozcieplyło i pora razy padały ji, coby se ta jakla ściepła, bo sie zagrzeje! Ôna tyż tak myślała, ale musiała nojprzōd poszukać jaki toalety, coby sie tam mōgła przeblyc, a tu jak na ujma nic niy było! Siadła do ôbiadu gryfnie ôbleczōno, ale pot sie ji po gymbie loł. Na to prziszła jeja siostra a padała:
– Byjatko tyś dycki tako uparto była, ale sama widzisz, że sie dzisio sparzisz, bezto byda ci musiała pomōc! – a poszarpła Byjatczyno jakla.
Knefle sie roz-dwa posuły, bo maszynōm były prziszyte, a Byjata ôstała na poły sago, yno ze kraglym na karku, a kupa gańby wyżyła!
Komentarze