Ło kuchynnych korzyniach

Do miynsa, radzi dowomy czorne korzyni, wonionce korzyni zaś do modrej kapusty, do łogorkow we łoccie, do łowiynziny a roztomańtych zupow. Wiela śląskich zupow niy obyndzie sie tyż bez bobkowych listkow. Do pieczynio roztomantych babowkow, kołoczy, kołoczkow a piernikow sulo sie mleto skurzica, zozwor a rzebyczki. A spominocie se łodpustowe bombony, co sie mianowały zozworki? Umicie se przedstawić kompot ze banie bez skurzice a rzebyczkow, bo jo niy! Te wszyski korzynie były drogi a zagraniczne, ale my tyż wiela naszych mieli a używali do warzynio. Choćby jagodki ze jałowca, dowało sie ich do łowoinziny abo miynsa ze dziwoki zwierziny. Krom cebule a czosku do miysa tkało sie tyż suszono fefermynica abo salba, a do zupow – peterzila a lubszczyk! A kminek se spominocie? Do kożdedo jodła, co ciynżkość na żełondku robiło, nasze starki dycki dosypowały kminku, bo łon był po to, coby my lepszy strzylać poradzili – tak dycki godoł mj tatulek, a mioł prawie! Nasze dziecka to sie niy radzi na kminek dziwajom, a downi to go było aż zatela we kartoflonce a kapuśnioku, a konsek łod nos wele Cieszyna do dzisio warzom czesko zupa kminkowka. Moja starka czynsto-gynsto dosypowała kminku do pieczynio chleba, a nom wszyskim to fest smakowało! Mój starzik (faterkow tatulek) łogromnie mioł rod gorzołka kminkówka (likier kminkowy), co bezmała bole we żełondku łagodziła. Jak my, jego wnuki, chcieli chociaż troszka popróbować, to nom dycki na nos wiyszoł jaki pierdoły! Dziołszkom godoł, że im broda jak starymu chopu łod tego urośnie, a synczyskom, że bydom mieć piersi jak baby, a my gupieloki, mu wierzili i żodyn sie starzikowej gorzołeczki ani niy tyknoł! Jedyn roz nasz starszy kuzyn spytoł sie starzyka czamu mu kminkówka niy szkodzi? To łon łodpedzioł, że to je wszystek bezto, że łon na starość już te wszyski wady mo i skuli tego mu już nic zaszkodzić niy poradzi! I tak by my se jeszcze dłogo godać mogli... Jak jaki inksze, stare miana na korzyni jeszcze pamiyntocie, to mi ich napiszcie!

Komentarze

Dodaj komentarz