Zaś mie posmykało!

 

 

Rudik łod Adamkowej Hildy, to był łochlapus i dycki mu sie co w nocy przidarziło! Mie sie zdo, że coby sie baba ze szwigermutrom na niego niy gorszyły, dycki im na nos jako pierdoła powiesił, a łone mu wierziły jak Ponboczkowi.
Roz prziszoł nad ranym cołki uwolany we marasie. Pysk mioł podropany, isto sie ze kerymś proł, ale babom padoł, że wele jarczykowego mostku spotkoł utopka i tyn gizd nojprzod doł mu we ciaprok, a potym go posmykoł, bezto je taki mokry a umordowany, a szeł zarozki spać! Baby sie wylynkały, a radziły Rudikowi, coby chociaż na jaki czas do kaczmy przestoł chodzić, ale łon sie yno łośmioł, a padoł, że se weźnie na tego gizda przitulijo, abo co świynconego. Coby baby niy bronczały mu nad łebom prziszoł do dom keryś roz pryndzy, ale potym zaś trefił na stare glajzy!
Inszy roz prziszoł do dom, jak już było widno, a babom nasmyśloł, że sie boł przelyź bez krzyżowka wele kaczmy, bo tam pod Bożom Mynkom jakiś borok siedzioł, nejści duch to był, bo wele niego stoł taki elegancki panoczek, yno, że pod czopkom mioł rogi a ze zadku łogon i godoł tymu borokowi, co do piekła ze jednym grzysznikiym mu sie lecieć niy łopłaci, bezto se poczko, aż kery gupi bez ta krziżowka przyńdzie, to łon go chyci, dusza śniego wyciśnie a do piekła jom tyż zawlecze!
– Same widzicie, że jo mioł strach przyńś, bo kery by sie wzion potym moja baba ze teloma dzieckami? Hilda tak sie fest wylynkała, że poleciała ze ciepłym do ujka, co wele nich miyszkoł, a łon i padoł tak:
– Jak łon je taki mondry, to ty mu musisz tyż co zrobić na bzdury, ale tak coby sie rychtik wylynkoł!
Jak ujek poradził, tak dziołcha zrobiła: przeblykła sie za śmiertka a czekała na rozmiłego chopeczka we krzach konsek łod chałpy! Jednako troszka sie boła sama we nocy, bezto wziena se swoja mamulka do pomocy. Rudik był tak nabelany, że jak yny Śmiertka ujrzoł, to sie ani niy wylonk yno wrzasknoł:
– Idź po ta staro małpica, co mi baba husuje!
Szwigermuter wszystek słyszała a tak mu namłociła, że sztylisko łod mietły na nim połomała! Łod tego czasu Rudik niy pił a potulny był jak mody kocik! Jak troszka popił to godoł yno: Ja, mamulko, mocie prowda mamulko!
Grymlino

Komentarze

Dodaj komentarz