Praje momy latowe feryje na karku, bezto chca wom padać, co taki szkolorze ze starszych klasow poradzili napochać! Ło tym cufalu mi godoł moj znajomek Eda, co pod koniec piyndziesiontych lot był we siodmej klasie. To sie zaczło łod tego, że dziecka mieli mieć łogromnie ciynżko „klasowka”, a synczyska zamiast sie uczyć poszli ze Edom na ryby! Jak na drugi dziyń prziszli do szkoły, dali pozor, że dziołszyska ranżyrujom po szkolnej siyni a se cosikej powtorzajom. To była cołko materyjo ze łostatniogo kwartału, no ale łone miały co powtorzać, bo sie uczyły, a synczyska mieli pod deklym próżno, to powtorzani na nic by sie zdało! Tu trza było dobrej łepy, coby co wykomkinować, i tyj „klasówki” niy pisać! Przileżitość nadarziła sie sama. Przed „klasowkom” była gimnastyka i Ecik Kolon spod ze tego klopsztyndra, co synczyska na nim szkopyrki ćwiczyli. Synek chciał sie gibym pozbiyrać, coby rechtor niy doł pozor, co sie stało, bo Ecik wloz tam niyproszony i by mu sie jeszcze po uszach noleżało, ale kamraty go przitrzimali na madracu, a zaczli wrzeszczeć:
– Proszym pana, proszym pana, Ecik sie potrzaskoł! – a synkowi kozali wajać, to jak mioł kamratów niy posuchać?
Rechtor skoczył ku nim jak sornik, ale jak ujrzoł, że synek je cały, to yno machnoł rynkom, a to synczyskom niy pasowało, bezto Stanik Kuśka, co jego tata był doktorym, padoł , że Ecika we plucach boli i trza go niyś do szpitala!
Do szpitala było jakich trzysta metrow i jak im pon rechtor padoł:
– To lećciecie śnim do doktora! – to dwa synczyska zrobili ze rynkow stołeczek, Ecik na niego siod, a jeszcze dwóch inszych żgoli sie uchyciło na zmiana niby do noszynio, a reszta tych wiyncy dupiatych musiała łostać we szkole!
We szpitalu im padali, coby szli ze pacjyntym na zadek, kaj było pogotowie, a tam kwilka poczekali aż przidzie doktor. Synczyska ze trzi razy łobkronżyli tyn szpital, co by czasu nabić i doktor musioł na nich jeszcze czekać. Zbadoł Ecika a sie łośmioł:
– No a teroz synki godejcie jako choroba mom mu wpisać: polski abo matematyka?
Synczyskow tak zatkało, że nic mu niy łodpedzieli, bezto doktor wzion czerwiono tuszka, a bez cołko karta napisoł: Symulant!
Grymlino
Komentarze