Do Niymcow se puda

Do Niymiec ni mioł daleko, bo Zobrze, co sie wtynczos Hindenburg mianowało było za płotym! Ujek troszka po nimiecku szprechoł, ale jego kamrat Jozef, tyn to godoł yno po naszymu, a po nimiecku rozumioł możnej ze trzi słowa, ale sie niy staroł, bo mu sie zdało, że Ślonzok sie wszyndy dogodo! Jego baba Hilda mu sztyjc bronczała nad łebom skuli picio piwa i łon wykombinowoł, że pudzie se do Niymcow, a tam se piwa kupi wiela yno bydzie chciał, a ku tymu jeszcze fest dobry łobiod, a Hilda sie ło tym niy dowiy! Piniyndzy uszporowoł se aż za tela, ale iść tam som niy chciał, bezto wzion ze sobom swojego nojlepszego kamrata – naszego ujka! Jeszcze niy doszli do granice, a Jozef zaczon skokać i ujek już w duchu żałowoł, że sie śnim wybroł. Ujkow kamrat walił prosto, udowoł, co grynca niy widzi, ani papiorow pokozać niy chciał, jak go szandara zastawił, a spytoł sie: wochin? To mu odpyskowoł:
– Aleś ty chopie gupi, do Niymcow ida, niy do Chin! – bo Jozef se myśloł, że Niymiec go niy zrozumi, a tyn grync tyż był nasz, bo mu łodpedzioł po cichu:
– Niyskokej gupieloku, bo po drugi sam niy wleziesz! A po nimiecku gośno im rozkozoł, coby szli dali.
Chopy połazili troszka po Zobrzu, bo ujkow kamrat chciał iść do tyj nojlepszej resztauracyje we mieście, ale tam ich niy puścili, bo ni mieli bindrow ani szaketow, ale w końcu sie kajś wciśli a noreście mogli se siednońć przi stoliku. Jozef kozoł se dać „cwaj biyr”, a jakiś jodło, co pokozoł palcym. Dobre niy było, ale go roz-dwa zjedli, bo głod już fest mieli. Zaroz wele nich za stołym siedzieli prawe Niymce, a jedli rychtik dobry łobiod. Jozefa piniondze świyrzbiały a tyż chciał taki, ale niy wiedzioł jako to pedzieć, a ujka niy chciał sie pytać, coby se za wiela niy myśloł, że je taki mondry! Łoroz usłyszoł jak somsiady wołajom: Nochmal das selbe! A zaś dostowajom to samo, co przed kwilom jedli! No to Jozef tyż tak wrzasknoł, ale ujek ze Jozefym dostali po drugi zaś yno te kwaśne piwsko a te same jodło, co im już karkiym wyłaziło, bo „nochmal das selbe” znaczy: jeszcze roz to samo!

2

Komentarze

  • Grymlino do Elisabeth 23 czerwca 2016 16:01Dziękuję pięknie za komentarz i za kartkę z pobytu w Solinie, serdecznie pozdrawiam
  • Elisabeth noch mal das selbe..... 22 czerwca 2016 16:35ale zech sie usmiola z tej geschichty-wajter so/weiter so/-i czekom na dalsze opowiesci. Te historie to naprawde dobre-Pani Grymel! Pozdrawiam

Dodaj komentarz