Łostatni retonek!

Jak go zakludziła do naszyj znajomej dyntystki, to potym dycki bez cołki tydziyń na nia pomstowoł, że tyla bolu musioł wystoć, jak mu we zymbisku wiertali, a do gowy mu niy prziszło, że jakby niy Tilka, to by go dziob boloł jeszcze wiyncy, bo mu sie ropa zbiyrała! Teroz tyż tak było, ale łon woloł ciyrpieć a lod przikłodać, ale we końcu już ani to mu niy pomogało! Jednako on sie dali swojigo trzimoł: do dyntysty niy podzie, a fertik! Po nocy karwynczoł a norzykoł, bezto cołko familii spać niy poradziła! Tego było już zatela i my trzi (Tilka, jejich cera –Zuzka a jo!) sie na niego ugodały! Siadły my se we kuchyni przi tyj nojlepszyj bonkawie, co Jorg tyż mioł rod, a zaczły my godać, jako to ludzie na zymby umiyrajom! Kożdo snos jakiś prawy przipadek znała, a ło nim łopedziała, bo my wiedziały, że Jorg stoi pod dźwiyrzami a sucho! Tyn, co jo łopisała, isto był nojgorszy, bo kamrat niy zdzierżył a wparził do pojstrzodka:
– Jeszcze mi powiydź, że kery nasz znajomy tego chopa znoł?! – ryknoł z wiyrchowiska.
– Znajomy to niy – łodpedziałach spokojnie – ale znajomo to już ja! Spytej sie Basie Pytlinej, łona tyż śnim robiła! Może ci pedzieć...
Jorg sie gibko wytracił a za śćwierć godziny był nazod łobleczony jak do drogi:
– Roztomiło babeczko – padoł Tilce – zawiozła byś mie do Konskuli? (Tak sie mianowała nasza dyntystka).
– Do jaki Konskuli? – niy poradziła spokopić Tilka. –Ty se sy mie robisz szpasy, Jorg, a jo to ni mom rada!
Troszka to trwało, aż sie dogodali, ale za poł godziny roztomiły Jorguś siedzioł u Konskuli na szezlongu pod aparatym do borowanio.
– Panie Jureczku, dzisiaj obędzie bez borowania, ale jak długo pan z tym chodzi? – spytała sie pacjynta, potym cosikej szkubła a wyciongła konsek kości, co siedzioł miyndzy zymbami. – Oj, nie ładnie, już wdał sie stan zapalny, antybiotyk będzie konieczny i coś przeciwbólowego...
We wieczor zadzwonił do mie Jorg a padoł, że go już niy boli, ale koniecznie chciał wiedzieć, eli tyn mój kamrat rychtig skuli zymba umrził? Isto mi niy dowierzoł!

Komentarze

Dodaj komentarz