Moja wina, moja wina

Jejich starzik łogromnie rod mioł piwo, a pora razy we tydniu se go kupił a wypił, a coby niy nosisz flaszek za kożdym razym na dwor do szopki, kozoł starce, coby mu pod stołym postawiła karton po bombonach, a łon se tam te flaszki składowoł. Jak mioł połno, szeł śnimi do sklepu we GS-ie, a zaś kupił se za nich piwa. Jednako jedyn roz tego jego piwa niy mieli i starzik wzion se flaszka wina. Był to yno zwykły jabczok, ale za to flaszka mioł łogromnie piykno. Starka sie trocha śmioła, że sie jejimu chopu we gowie na staroś poprzewracało, bo sie artysta śniego zrobił! Bezto łod nerwow starzik tyn jabczok som wypioł, a starka za to na niego nabuczała:
– Som żeś wszystek wysłepoł, a teroz jeszcze ta flaszka ze wina do kartona ciśniesz! A weź jom lepi wywol do hasioka!
– Jo se moja flaszka z wina łostawia, bo mi sie podobo! – padoł starzik, trzasnoł rynkom we stoł, a haja wisiała we lufcie.
Te wszystki godki słyszoł jejich wnuczek, co mu było kole półtora roku, ale jeszcze ani wiela niy godoł, no to sie nim ani fest niy przejmowali, a hnet ło tyj zwadzie zapomnieli.
Za pora dni ku nim prziszła somsiadka. Baby se już doś kwila pogadywały we kuchyni, jak łoroz wloz do izby tyn maluśki. Zaroz zrobił yntka pod stoł, wyciongnoł ta starzikowo flaszka po winie, a zaczon jom wlyc po delinie. Graczka sie mu fest widziała, bo se buczoł pod nosym: Moja wina, moja wina, moja wina!
– Posuchejcie yno – padała somsiadka
– co tyn mały gizdok godo!
To była woda na starczyn młyn!
– Widzisz stary! – padała strzikowi. – Ty jabczok słepiesz, a maluśki za twoji grzychy żałuje! – a mrugła przi tym do kamratki.
Starzik sie wkurził, a babom łodpedzioł:
– Co wy tyż gupie babska słyszycie, przeca Józik jeszcze godać niy umi!
Potym zarozki chcioł bajtlowi flaszka zebrać, ale mały sie niy doł, yno wrzeszczoł:
– Moja wina! Niy dom!
Kwilka sie łoba szarpali, aż flaszka poleciała na zol a pukła!
Synek sie rozbeczoł, a starzik wkurzony skoczył do dźwiyrzy, a tak fest nimi rypnoł, aż sie puc posypoł i starka zaroz miała robota! Tak to ze graczkow prziszło na płaczkow!

Komentarze

Dodaj komentarz