Dzisio je twój dziyń

– Wiysz Zosia – padałach i – jobych se zrobiła rychtik frajny dziyń, poleżała we łożku do dziesiontej, łobiadu bych niy warziła, a dziepiyro co na swaczyna, choćby jaki kołocz a dobry tyj abo bonkawa, coby wszyjscy we chałpie pamiyntali, że mamulka wielgi świynto miała!
– Ty jeszcze dziołcha niy wiysz, co godosz! – łośmioła sie Zosia. – Jo to mom za kożdym razym, ale mie to tela nerwow kosztuje, żebych wolała prziś do roboty a w spokoju se posiedzieć!
A potym nom łopedziała jako u ni łońskigo roku we Dziyń Matki było. Trefił praje we sobota, a we tyn dziyń je dycki kupa roboty! Już we wieczor chop i pedzioł, coby wczas niy stowała, a trocha se pospała, bo łon i synki planujom i świynto zrobić!
– Ale chopeczku – próbowała sie bronić – dyć je tela roboty! Jo se myślała, że ło siódmej stana, a wciepna cołki prani ze tydnia do pralki!
– Nic sie niy martw, babeczko – uholkoł jom – jeszcze je w czym chodzić, a robota ni ma zajonc, to niy uciecze!
We pyndzialek zrobisz!
A we pyndziałek Zofija miała mieć inwyntura i niy wiadomo było, kej bydzie w doma, ale posłuchła, bo czego sie niy robi, do spokoju w doma!
Rano jak jeszcze niy było sześć, już stoli nad niom te dwa małe żgole: Jerzyk a Piotruś, jedyn ze kwiotkami a drugi ze tytkom bombonow, coby mogli nojpiyrsi mamulce powinszować! Zaroz zabronili i wyłazić ze łożka, bo sami (czytej ze faterkiym) bydom śniodani robić. Spać sie już niy dało, bo potym jeszcze ze trzi razy prziszli sie pytać kaj je tyj, masło a czyste talyrziki. Po nich przilecioł tatulek, bo niy wiedzioł, jak dłogo warzi sie jajca. Bez ćwierć godziny było cicho, za to żełondek zaczon sie Zosi przewracać ze głodu, bo normalnie, to łona już downo po śniodaniu była, ale do świyntego spokoju, padała se, że jeszcze troszka wydzierży, coby im tyj niespodzianki niy zepsuć! Coś tam jeszcze we kychyni na zol spadło, isto jakiś gorczek! A potym jeji chop szpetnie przeklon, choć tego przi dzieckach niy robił, a za moment wlecieli do izby wystraszone synki, a padali, że tata ucion sie nożym we palec!

Komentarze

Dodaj komentarz