Ło szporobliwym warzyniu

Isto to samo co i my: garniec ze fetym abo jako inksi godajom ze tustym. Mie dycki nojwyncy smakowoł tym ze szpyrkami, a jak mamulka do tego troszka boczku łoskwarziła to było nebo we gymbie! Ło bajlagi to sie żodyn niy pytoł. Masło było yno na świynta, a moja mamulka czasym miszung robiła: dwie kostki margaryny a połfontek masła, ale we tym jo niy gustowała! Olyj ze rapsu tyż dycki u nos we flaszce stoł, ale smak mioł łoszkliwy, niy to , co dzisio, co sie go idzie samego napić, jak kery mo to rod! Nojczyńści to my na nim piykli placki kartoflane, a roz nom mamulka zrobiła taki na blasze pieczone, ale to już niy było to… placki były suche a fest sie drobiły! Wtynczos sie wiela na jodło niy wydowało, ale tyż ani niy było co wydować, bo ze tego, co tatulek we hucie zarobił ciynżko było do piyrszego przeżyć. A jeszcze ze tego na mlyko do małego bracika musiało styknońć, bo już na cycku niy wisioł!
Na łobiod dycki sie warziło, co w doma było: Kapuśniok ze zimiokami (ze kwaśnej abo biołej kapusty), a jak do tego trefił konsek wusztu, to świynto we chałpie było! Nikerzi tymu godali ańtop abo flaps. Roz za czos my mieli we piontek kartofle ze zecajym a bez lato starka ku tymu zrobiła szpinat. Na zegrodce go dycki troszka rosło. Czasym szałot zielony był do łobiadu, a mynso to my na talyrzu tak ze dwa razy we miesioncu widzieli! Za to żur był czynsto-gynsto i nikerym sie tak zbrzidł, że go teroz niy warzom.
Na wieczerzo było to co wszyndy: wodzionka, co jom tyż nikerzi na śniodani jodali. Starka czasym do ni zimioki łod łobiadu wciepła, po lichym łobiedzie konsek krupnioka tyż sie na wieczor trefił, a dziecka roz za czos grysek na mlyku dostały. Zimioki ze szpyrkom a ze kiszkom, abo ze maślonkom, jak jom kery mioł, to co drugi dziyń były, a jak mlyka brakło to ze kwaskom sie zimioki jodało. Nasza starka tyż nikedy uwarzyła pogański krupy ze śwyżom szpyrkom, ale wtynczos jo ni miała tego rada, a dzisio mi fest smakujom! Jako to sie ludziom smaki zmiyniajom, ani by sie niy zdało?

1

Komentarze

  • Elisabeth szporobliwe warzynie 08 października 2015 18:52to kiedys ludzie zdrowo zyli,choc nie bogato.Nie bylo tego cholestolu,dietow,roztomantych silowni co teraz jest.Teraz wszystkiego pod dostatkiem-nie dosc,ze duzo jedzienia sie wyrzuca,marnuje,to caly czas sa nowe choroby-bo kiedys to jedzenia bylo zdrowe-a nie na "prochach"-tak jak dzisiaj,caly czas chemie jedzymy-moze tak naprawde to przemyslec?To byl bardzo dobry artykul do przemyslenia......

Dodaj komentarz