Hań downi na szczworto niydziela Postu godali we kościele „niedziela róż”, a że u nos jeszcze te kwiotki niy kwitły, to se jom ludzie pomianowali po swojimu, a godali na nia kwietno. Jak mi niy wierzicie, to przijedźcie do Żorow a idźcie se do farnego kościoła świyntych apostołow Filipa a Jakuba, tam wele zakrystyji momy nagrobek ze XVII wieku. Je tam pochowany żorski kupiec Girzi Latany ( po naszymu Jerzy Łatany), co umrził trzi dni przed niydzielom kwietnom. Napis je po morawsku, ale leko go poczytać idzie, bo morawski był do polskigo podany. Napisałach, że był i to je prowda, bo już downo sie tego jynzyka niy używo, a nikerzi go ze jynzykiym czeskim mylom, co sie w nim pisać zaczyno jednako troszka niyskorzi (XVIII/XIX wiek).
U nos Wielgi Post przipado po połowce lutego, two cołki marzec a czasym i konsek kwiytnia, to je tyn czas, co już momy wiosna na karku, ale kwiecio wiela niy uświodczysz! We lutym, to kwitnom na zegrodkach a we lasach przebiśniegi a śnieżyczki, ale ni ma ich wiela i jo musza sie przyznać, że naszego, ślonskigo miana łod tych kwiotkow niy znom, jak kery ło tym cosikej wiycie, to mi go napiszcie. We marcu u mie na zegrodce pokazujom sie żółte a lilowe szafranki (krokusy) a we kwiytniu modre kukołki (szafirki), ale jo se sama ich tam nasadziła, a ze polnych kwiotkow to co nojwyżyj na polu abo na niyużytkach potkać idzie podbioł a gynsi pympki. Te łostatni, jak yno śniyg ślezie zaroz sie pokazujom, ale wioniuszka śnich niy do sie zrobić, bo som za krotki. Jak je ciepło, to poczontkiym kwiytnia momy narcyźle a potym tulpy, a we lasach insze drobne biołe a żołte kwiycie (zawilce), ale musza sie wom przyznać, że jo go tyż po naszymu pomianować niy poradza, krom pietrowych kluczykow (pierwiosnki), co ich wszyjscy znomy. Dziepiyro po Wielkanocy przichodzi czas na fijołki a nasze mlycze żółte a potym na kwiotki roztolicznej barwy, a jo sie już tego doczkać niy poradza.
Komentarze