Chudy jak Rync

Syndziow żorskich zamianowało państwo polski a adwokaty sami prziciongli, bo liczyli na dobry zarobek i mieli prawie, bo we takim małym mieście dycki sie ludzie wadzili, jak niy ło ańfart, to ło łobraza, abo ło niywrocone piniondze.
Nojlepszy jednako był taki niywielki hruby reksenwald, co troszka sprawy przeciongoł, ale jak mu kery dobrze zapłacił, to na swoji dycki wyszoł. Bezto ludzie godali, że to je dobry adwokat! Tyn chop mioł łogromnie chudego psa a czynsto szpacyrowoł śnim po rynku. Bezmała tyn pies był rasowy, ale we Żorach ludzie jeszcze nigdy niy widzieli psa, coby był bardzi podany do kozy na wysokich szłapach niż do inszych psow!
Roz we dziyń targowy jedyn mieszczan powadził sie ze chopym ze Osin, abo ze Baranowic, bo to roztomańcie ludzie godajom! Przileciała policyjo i sprawa poszła do sondu. Tyn chop ze wsi był biydny i dostoł reksenwalda „ze urzyndu”, prawie tego wyszczekanego panoczka łod chudego psa i sie radowoł, że mu isto pomoże, ale jeszcze niy wiedzioł, co sie świynci! Mieszczan ugodoł sie ze tym adwokatym, że wszystek sfalom na chopa, syndzia do mu mało kara, a bydzie po sprawie!
We tyn isty dziyń do sondu prziszło kupa ludzi, coby sie podziwać, jak to sie wszystek skończy. Miyndzy nimi była tyż baba, łod tego chopa ze wsi. Znano była ze tego, że dycki wyszczekała za cołko familijo i jak syndzia i tyn fałszywy reksewald zaczyni najyżdżać na jejigo chopa, łona wyskoczyła na pojstrzodek, a spytała sie grzecznie Wysokigo Sondu, eli może coś pedzieć! Syndzia widać nic niy przeczuł, bo sie zgodził!
– Usrany sfas reksewald! – rykła baba na adwokata swojigo chopa. – Wiela wom tyn bachrocz ze miasta zapłacił, że mojigo chopa, co je chudy, jak tym wypitraszony harynek abo, niy przimierzajonc, wasz pies Rync, chcecie wciś za balek, yno za to, że bronił swojigo...
Niy dała rady skończyć, bo cołko sala gruchła takim śmiychym, że syndzia kozoł wszystkich wykludzić!
Baba dostała kora za łobraza sondu, a adwokat łod gańby wynios się ze miasta!

Komentarze

Dodaj komentarz