Gdo to był?

Wszystek było na „kartki”. Towor taki jak monka, krupy abo sol dostowało sie wtynczos we miechach a masło a łolyj – we beczkach! Ludzie musieli nojprzod prziniyść do sklepu miyszki a garce,
a na drugi dziyń prziść jeszcze roz po łodbior. Te mode sprzedowaczki mogły rozwożyć cołki towor dziepiyro jak zawarły sklep, bezto czynsto siedziały w robocie do połnoce, ale rade były, że ta robota majom!
Nojgorsze jednako było iść tak niyskoro do dom. Już bez dziyń miasto zdowało sie jak wymarłe, chocioż miyndzy gruzami ludzie pomiyszkiwali, a bez rynek czasym jaki kot abo pies przelecioł, ale w nocy człowiek niy uświodczył ani ducha...Chocioż to niy była tak do końca prowda, bo ludzie godali, że keryś widzioł, jak nimiecki wojoki polili we nocy fojery na szkolnym placu! Jak sie modo dziołszka nasuchała takich godkow ło duchach, to niy dziwota, ze sie boła i coluśko droga rzykała za umrzikow! Zanim doszła do rynku, wylynkano jak zelter, szła wele zarośniyntego parku, kole wypolonej szkoły, starego cmyntorza a strzaskanego kościoła, potym jeszcze bez ciymno boczno ulica,
a konsek miyndzy chałpami i noreście była w doma. I tak szło kożdy dziyń!
Jedyn roz wele cmyntorza spotkała jakoś niywielko, na czorno obleczono starka. Chciała „pokwolić Boga”, ale starka jom ubiygła, bezto łodpedziała yno „na wieki wiekow, amyn”, a poszła swojom drogom. Za pora dni zaś spotkała starka we tym samym miejscu.
Dało i to troszka do myślynio, bo tyj starki dziołcha niy znała, a przeca robiła we jedynym sklepie, kaj ludzie brali „przidział”! Pogodała ło tym ze swojom mamulkom, ale łona i łodpedziała, że to możnej je jako przibytno, co kartek ni mo, bezto ku nim niy prziłazi.
Po trzeci spotkały sie, jak na niebie świycił miesionczek, ale mamulka
i tak niy widziała starczynej gymby, bezto jak sie minyły, prziszło i do gowy, coby sie mogła chocioż podziwać, kaj ta starka idzie! Łobrociła sie, ale na drodze żodnego niy było!
Ale sie dziołcha wylynkała, łona przed kwileczkom przegodała ze duchym! Przeżegnała sie a jak sornik pognała ku chałpie!

Komentarze

Dodaj komentarz