Kloc wusztu

Łogromnie jom tam fajnie przijyni, a niczego i niy żałowali, bo łona tyż ich piyknie ugościła, jak ze dwa lata nazod, po piyrsze po tela latach do dom przijechali. Bezto łoni chcieli sie i łodwdziynczyć i kaj sie yno dało to jom posmykali. Tyjatry, muzyki, muzea, kościoły a sklepy wielgi jak cołki stare Żory, to wszystek miała pozaliczowane i niyroz już starka godała bratu a bratowej, coby zrobić ze dziyń – dwa pauzy, bo już na szłapy niy zdzierży, ale była łogromnie rada, że sie w końcu we świat wybrała a wszystek sie i widziało, bo tam było rychtik piyknie a nowocześnie!
Jednej rzeczy jednako niy poradziła strowić: te nimiecki jodło wcale i niy podeszło! Chlyb pszynny a dycki jakiś mokry, a u nas ze prywatnej piekarnie to chleboszek był żytni abo poł na poł, a jak sie go gryzło, to aż trzeszczoł we zymbach! Jeszcze te wuszty - kajjaki zorty a smak tyn som, niy to co u nas! Yno na kyjzy starka niy norzykała, bo bezmała dobre były!
Jak prziszła nazod, to wszyskim godała, co jom potkało we tych Niymcach zaroz przi piyrszym śniodaniu! Isto niy umiała tego strowić?! Jeja bratowo, co tyż je baba ze Ślonska, wczas rano wystrzeliła do łosiedlowego sklepu a prziniosła troszka lepszych żymłow, konsek czornego chleba, co tam bezmała majontek kosztowoł a wielgi papiorzany talyrz ze kajjakim wusztym, yno że ze kożdej zorty było po pora plackow. Dulymbino myślała se, że tego wszystkigo poprobuje, ale kaj tam, co lepsze konski roz-dwa sie straciły, łostoł yno lyjberwuszt, ale był taki masny, że sie potym starce nim ze dwa dni bekało! Łoni se skuli ni tela starości narobili, a łona by rada zjadła kloc wusztu, choćby oplerka, jako to sie u nos robiło! Po jedno była rada, że stary Dulymba śniom niy jechoł, bo łon dziob mioł niywyparzony, a jeszcze by skuli tego zwady a gańby narobił, bo jak by taki talyrz ze wusztym łoboczył, to by sie zaroz spytoł, eli te jodło je to do szpoka, bo do chopa isto je tego za mało!
A teroz, my tyż tak jodomy!

3

Komentarze

  • Grymlino. Do Stanika z Rybnika 26 października 2014 17:30Dziynkuja Wom za komyntorz, myśla, że ze mojom ślonskom godkom ni ma jeszcze tak źle, skoro mie poczytać idzie, ale nojwiyncy mnie raduje, że ludzie jednako czytajom to, co napisza! Serdecznie pozdrowiom a czakom na Wasze nowe komyntorze.
  • Stanik z Rybnika Kloc Wosztu Grymlinej. 24 października 2014 12:58Grymlino , BRAWO, jino wiyncy po noszymu , pijyknie to se czyto (lyzuje) jo tysz boł we Essyn na bysuchu.
  • Stanik z Rybnika Kloc Wosztu Grymlinej. 23 października 2014 22:39Grymlino , BRAWO, jino wiyncy po noszymu , pijyknie to se czyto (lyzuje) jo tysz boł we Essyn na bysuchu.

Dodaj komentarz