Godało sie, że coby być gryfnym a zdrowym bez cołki rok, styknie sie umyć we Wielgi Piontek we rzyce, ale trza tam było być rowno ze słonkiym! Jednako lekcy padać niż robić, ale my ze bracikiym mieli swoji metody! To była cołko akcyjo: nojprzod po cichuśku we wieczor zebrać mamulce budzik ze kuchynie, potym go naciongnońć, coby dzwonił ło tyj, co trza, godzinie, a ze tym tyż niy było tak łaps, bo nasz zygor dycki szeł niyskoro, za to dzwonił ćwierć godziny do przodku, bezto, to w końcu na jedno wychodziło. Potym trza było skryć budzik pod pierzina, coby tatulka a mamulki zawczas niy łobudzić, bo jak sie narobili, toby radzi do siodmej przi świyncie pospali!
Jak my stanyli, gibko my sie łoblykli, a zaroz na kalup gnali ze gorki ku Głymbokimu Dołu. To był taki stow, co po nim już ani znaku ni ma. Do niego wpływała rzyczka, co w ni była łogromnie zimno woda! Małokedy byli my piyrsi, bo ze cołki ulice lecieli tam modzioki ze kiblami, coby nanosić tyj zimnej wody łojcom a starkom. Wtynczos małokery mioł studnia na placu, bo u nas woda je fest głymboko we ziymi!
Gymbulki my umyli wodom ze rzyki, a potym nabrali my ji do piyknej, emaliowanej konewki, co mamulka dycki stawiała na umywalce. Teroz to dziecka niy wiedzom, jak konewka wyglondo, ale starsi se jom isto spomnom, szło w ni woda trzimać, ale ze przinoszynim było troszka gorzi, bezto my poła wody po drodze roźloli, a łoba my prziszli do dom utoplani! Mamulka sie na nos wtynczos gorszyła, a przezywała, że zbankrotuje, bo bydom jom lyki wiela kosztować, ale dziynka Bogu, my nigdy sie na Wielkanoc niy rozchorowali. Szkoda nom było czasu na leżyni we łożku, jak sie tela na łokoło dzioło a ze szpajzyszranku woniało wyndzonkom, wusztym abo dobrom babowkom.
Po połedniu trza było zrobić jeszcze kroszonki, bo we Wielgo Sobota nasz farorz świyncił z rana koszyki ze jodłym. Jedyn roz zebroł nom ta nojpiykniyjszo kroszonka, a na drugi dziyń kozoł mie zawołać do zakrystyje a piyknego baranka ze porcelany, coch dostała, mom do dzisio!
Komentarze