Biercie sie do nauki!

01-09-2010

Jeszcze za Niymca, kiej do szkoły chodziła moja starka, dziecka kończyli yno sztyry klasy, bo tako szkoła była we wsi, ale podle bismarkowego prawa, do szkoły trza było chodzić aże łoziym lot. Bajtle musieli pomogać na gospodarce, to łojce woleli płacić sztrofa a łostawić ich w doma. Jak mieli synka, to szoł robić na gruba, do huty, do wyuczynio fachu abo łostowoł na gospodarce. Dziołsze stykło, że poradziła sie podpisać, piniondze policzyć a poznać na zygarze, wiela je godzin. Ważniyjsze było, coby umiała warzić a szyć. Ale były tyż takie familije, kaj łojce do nauki naganiali. Jak mieli piniondze, to chcieli, coby jejich dziecka łostały kim ważnym: rechtorym, ksiyndzym abo reksanwaldym. Starzik łod mojij mamulki tyż chodził do gimnazyjum do Opolo, ale potym dali niy szoł sie już szkolić. Jego łojce radzi by w rodzie ksiyndza mieli, ale synkowi to sie widać niy widziało! Trza prziznać, że to był mondry chop a wiela ludziom pomog, ale tyż go roz we życiu skradło. Trzimoł piniondze we banku, bezto kupa stracił po piyrszej wojnie.
We familiji łod mojigo łojca wszystki chopy fesztrami byli, tak było już ze dwiesta lot nazod abo i wiyncyj! Moj tatulek tyż mioł mieć taki fach, ale nojprzod szoł sie uczyć do szkoły kupieckij do Katowic, bo we starzikowej firmie, kaj mioł na prziszłość robić, godali, że feszter musi mieć niy yno para, ale i olyj we gowie! Potym prziszła drugo wojna, a po nij moj tatulek do lasa niy trefił, yny robił we hucie prawie szterdziyści lot a nigdy niy żałowoł, że sie tela za młodu musioł uczyć. A wiela nom, dzieckom do szkoły poradził pomoc! My ze bratym to byli takie wypole, ale do nauki nos żodyn niy musioł naganiać. Jak tatulek kozoł sie uczyć cudzych jynzykow, to my na dodatkowe godziny lecieli, aż sie kurziło, bezto teroz sie wszyndy dogodomy. To samo żech godała swojim dzieckom, ale gorzij mi troszka poszło ze wychowankami, bo łoni sie cudzych jynzykow za żodne skarby uczyć niy chcieli! Myśleli, że bez cołki życie we Polsce miyszkać bydom, ale tak im niy klapło, bezto teroz godajom, że gupcy byli, bo sie niy uczyli!
Roztomiłe dziecka biercie sie do nauki, cobyście tyż tak za pora lot godać niy musieli!