Sirynkom do Włochów

07-07-2010

To było we tych czasach, kiej na naszo sirynka godali pieszczotliwie: krolowo szos! Nasz somsiod Waldek nabył taki piyńcioletni wehikuł, dobrze go wyrychtowoł a wyglancowoł, bo chcioł nim jechać za granica – do samych Włochow! Starka go straszyła, że tam same porwane ludzie miyszkajom, ale łon sie zapar, że na dziesionto rocznica ślubu swoja babeczka do Rzimu zawiezie. Łodstoli łoba pora godzin, coby dostać te sto dolarów, co im sie na ksionżeczki walutowe noleżały. Za złotki kupili namiot a jodło, co sie niy psuło. Śpiwory zrobiła im starka ze dwoch rubych dekow zeszytych do kupy. Na wszelki wypadek wzieni se jeszcze dwadziestolitrowy baniok wody a pojechali!
Po drodze mieli ze Cilkom tela przigodow, że sie ani we głowie niy miyściło! Jo tymu ani wiela niy wierziła, bo somsiod był wigyjc, ale jego babeczka to wszystek potwierdziła! Zaroz na granicy nasi kozali im cołki auto wyladować, bo ni mogli uwierzić, że do Włochow niy jadom na handel, yno na wycieczka. We Czechosłowacji chycili ich policjanty a straszyli mandatym. Waldek ponoć za gibko jechoł, chocioż Cilce sie zdało, że to było prawie na łopy! Jak im padali, kaj jadom, to policjonty yno głowami pokiwali a padali, że to bydzie dziepiyro „pokuta”.
Somsiady byli radzi, że im tak wszystek gładko poszło, ale ni mieli ani pojyncio, co ich jeszcze czeko! Na Wyngrach kapli sie, że stracili mapa. Isto to było wtedy, jak przed bykiym zdybali, co im chcioł namiot przewrocić. Musioł mu sie czerwiony kolor niy widzieć! Dobrze, że sirynka mieli siwo, to gadzina dała i pokoj! Cilka godała, że te miejsce zaroz się i niy widziało, ale było poźno wieczor, a łoni byli tacy zmochani jazdom, że już na nic niy zważowali, yny leźli do śpiworow! Mapa kupili se nowo, ale niywiela mieli śnij pożytku, bo wyngierski to je taki jynzyk, co śniego nic niy wykombinujesz! Troszka lepszy było we Jugosławii, tam ludziska troszka polski rozumieli. Za dwie pory teksasow dali Waldkowi stary namiot, kupa jodła a banioczek wina. Kole połednia somsiady podjechali do szlabanu pomalowanego na bioło-czerwono-zielono, a do Włochów mieli już yny tela, co czopkom ciepnońć!