Nowiny.Rybnik.pl › Po naszymu › Region › Wydanie: 2010/24 (2760)

Gołymbiorze

16-06-2010

Moj somsiod Konder Kukla łogromnie przoł pultom. Gołymbnik mioł nojpiykniyjszy we łokolicy! Nad warzkuchniom, kaj piyrwej mioł swoja ajncla starzik Łomozik, terozki urzyndowały gołymbie, a śnimi Konder a potym tyż jego baba Hyjdla. Yny jejich synek Jorguś ło pultach niy chcioł ani słyszeć! Wszystek łod tego czasu, jak mu tatulkowy pupilek srokocz, łobsroł kamratka ze klasy, a łona potym wszystkim dzieckom godała, że jak idom do Jorgusia, to majom se wziońć parysole abo rygenmantle!
Somsiady jak to somsiady: jedni Kondrowi zowiścili, że mu te ptoki tak pszoły, aż mu na gowie a na rynkach siodały a drudzy sie we czoło klupali, a godali, że tyn chop mo ptoka!
Roz za czos jechoł Kukla do roboty do Nimiec, czasym bez lato niy było go w doma i ze trzi-sztyry tydnie. Jak w tyn czos przipadły flugi, to był cołki chory, porzad dzwonił do swoji baby a dowoł i insztrukcje, co a jak mo robić!
Jak mu kiejś dwa gołymbie niy prziszły, to niy zdzierżył, ciepnoł robota a piyrszym cugiym przijechoł do dom, a te gizdy yno na to chyba czekały, bo jak Konder zawar furtka, to jedyn po drugim wleciały do gołymbnika. A łon się yno łośmioł, a padoł, że te ptoki przed nim reszpekt majom!
Jedyn roz Konder puścił swoji pulty na flugi aż do Belgije. Ni mog ani uwierzić, że te ptoki tak sie poradzom uwinońć. Radowoł sie łogromnie, że jego gołomb bydzie na piyrszym miejscu, bezto gibko ściongnoł mu guminowy ring ze szłapki a kozoł Jorgusiowi, coby go zawioz do zygara. Synek gibko wskoczył na koło a gumin wsadził do gymby, bo we badkach ni mioł kapsy. Kole Materowej chałpy jakiś pies mu przelecioł bez droga. Jorguś zabrymzowoł, a zaroz potym wywalił sie do rantu a przi tym połknoł tyn guminowy ring, co miał iść do zygara. Chocioż był fest potrzaskany, polecioł gibko ku mamulce, bo łojcowi boł sie pokozywać na łoczy. Kukle mało hercszlag niy trefił! Chycił flacha ze rycynom a cołki kieluszek wloł synkowi do gymby. Za kwilka Jorgusia zaczło morzić, a po połgodzinie Konder mioł nazod swoj guminowy ring a som go zawioz do zygara łodbić. Jednako za długo to wszystek trwało, bo mu piyrsze miejsce sprzed nosa uciykło! Za to borok Jorguś pod łofiarom łojcowego zamiłowanio, bo jeszcze bez cołki tydzień mioł sraczka.