Nowiny.Rybnik.pl › Po naszymu › Region › Wydanie: 2010/21 (2757)

Być mamulkom

26-05-2010

Być mamulkom to ni ma tak łaps, wiym to po siebie. Krom swojich dziecek (syna a cery) miałach jeszcze troje bajtli we rodzinie zastympczej. Teroz wszyjscy miyszkajom łosobno, ale dycki jak som we Żorach, przidom sie do nas pokozać. Winszujom nom tyż na urodziny a na świynta. We Dziyń Matki isto sie moga spodziywać telefonu abo esemesa ze życzyniami! Teroz to tak piyknie wyglondo, że nawet nasz farorz na kolyndzie nos pokwolił, że my dziecka dobrze wychowali, ale ze poczontku to było ciynżko. Swojich rodzonych żech znała, a tyż mi niyroz co wystrugali, a tych bajtli, co prziszli do familiji, toch musiała nojprzod poznać, a troszka żech tyż śnimi wystoła! Jedyn syneczek prziszoł ku nom, jak mioł piyńć lot a gibko ku nom przibadoł, ale te starsze mieli już po dziesiyńć lot. Wiela sie po świecie natułali, a na wszystek mieli swoji zdani, ale jakoś my se ze chopeczkiym dali rady, chocioż niy wszystek poszło tak, jak my se to przedstawiali!
Czynsto spominom, jak żech bez feryje uczyła wszystki dziecka warzić. Po poru dniach zdało sie im, że już wszystko umiom a wzieni sie za warzyni łobiadu. Ziymioki, miynso a szałot ze pomidorow to im poszło dobrze, yno zupa było ciynżko rozeznać, co je za jako, tako była czorno łod magi! Abo jak mi roz na Dziyń Matki chcieli zrobić babowka! Wszystko tam dali, yny ło monce zapomnieli, ale jo na te szczyńści prziszła do dom pryndzyj, niż łoni blaszka wsadzili do bratruły.
Ciesza sie, żech miała tako wielgo familijo, chocioż pynzyjo byda mieć teroz maluśko, bo bez pora lot siedziałach ze dzieckami w doma, ale łone tego potrzebowały! Ni miałach rada, jak na nos godali „rodzina zastympczo”, To sie słucho jak coś gorszego, co je yno na tynczos! Dziecek niy do sie wychowywać yno na tynczos!
Łostatnimi czasy czytałach, że urzyndniki, co majom pomogać rodzinie, przeciepujom dziecka ze jednej familiji do drugij a porzond myślom nad tym, coby było tonij, ale czy na prziszłości tych biydnych bajtli koniecznie trza aż tak szporować? Lepij by było, jakby se te dziecka łostały we swojij familiji, za to jejich łojcowie dostaliby dozor, eli sie wywionzujom ze swojich łobowionzkow.