24 maja 2012

Znak zodiaku: Bliźnięta
(23.05 - 21.06)
» horoskop dla Bliźnięta

Pogoda dla:Rybnik [ zmień miasto ]

DziśJutro

2114°C

186°C

Imieniny:
Maria, Wincenty, Milena
» złóż życzenia

Przeszukaj: internet artykuły katalog firm

Branża:

Utwórz kanał RSS: artykuły

Zapisz się na newsletter, który otrzymasz na adres e-mail: wysyłaj:

Zaloguj się do swojego profilu: [ zapomniałem hasło ]

Nie masz jeszcze konta? Zarejestruj się

Zaloguj poprzez Facebook

Nowiny.Rybnik.pl › Po naszymu › Region › Wydanie: 2010/19 (2755)

Majowe procesyje

12-05-2010

Piyrsze dni krziżowe przipadały na św. Marka (25 kwiytnia). Pamiyntom, że moja starka Elza dycki godała, że na Marka sieje sie groch. Niy szło tego zrobić ani pryndzy, ani poźni, boby był chrobaczywy. Warziło sie śniego potym bez zima zupa na wyndzonce abo na wuszcie, bo grochowka na kościach niy była już tako dobro! Dzisio radzi jodomy kapusta ze grochym na Wilijo, ale kiejś to było jadło na kożdydziyń. Słyszałach tyż łod starki ło monce grochowej, ale do czego sie to używało, już niy pamiyntom.
Grochowinami szło gadzinie podścielić, jak było mało słomy. Ludzie ciśli ich tyż do strużakow, ale spało się na nich niy nojlepi, nejści twarde były!
Drugie dni krziżowe przipadały we maju przed Wniebowstompiyniym Pana Jezusa. W tyn czos chodziły procesyje ku krziżom i kapliczkom, a ludzie ze ksiyndzym rzykali ło urodzaje.
Jedna tako procesyjo ze trzidziestych lot mom na fotografiji. Gdo te zdjynci zrobił niy wiym, ale jedna ciotka mie łobjaśniła, że to je procesyjo, co chodziła ku krziżom na Piekuczu a na Szoszowach. Na przodku jakiś synek niesie krziż, co je cołki łobstrojony kwiotkami, że go ledwie widać. Zaroz za nim idom dziołchy ze sztandarami, we pojstrzodku ksiondz, a za nim baby a chopy. We moju dycku ludzie schodzili sie przi kapliczkach a krziżach na „majowe”. Sami rzykali litanijo a śpiywali pieśniczki Paniynce Maryji. Dwa taki miejsca pamiyntom: jedne we Żorach wele kapliczki łod świyntego Jona na Kościołku, drugi na Biesie we Rowniu, ale niy wiem, eli sie tam jeszcze co dzisio łodprawio.
Jak jeszcze żyła nasza starka, dycki spominała ło szywołdzkim krziżu. Wystawił go jakiś wojok ze cudzej krainy, co służył pod Napolionym. W czasie wojny trefiła go kula ze karabinu, ale niy zrobiła mu żodnej szkody, bo mioł we kapsie lyskowe łorzeszki i od nich sie łodbiła. Byłach ciekawo, kaj tyn Szywołd je, bo na mapie niy był zaznaczony. Jak żech poznała mojigo chopa, łon sie zaroz kapnoł, ło czym godom, a mie tam zakludził. Tam je łogromnie piykno droga, co wiedzie miyndzy polami ze Bojkowa (dzielnica Gliwic) do Knurowa, a co konsek stoji na ni kamiynny krziż. Padom wom, jak bydziecie mieć troszka czasu bez letni feryje, isto sie tam wybiercie! Te wszystki krziże postawili Niymcy ze Szywołdu, ale możnej je miyndzy nimi tyż tym, co ło nim starka bojała, yno że teroz to już żodyn niy wiy kery to je!