Jak mi było ze piyńć lot, tatulek wzion mie do kina na turecko bojka. To było ło takim synku, co łogromnie rod jodoł chałwa, a jo jom tyż miała rada. Jak sie sułtan go spytoł, co by chcioł za nagroda, to łon padoł, że yno kupa chałwy. Tatulek godoł synkowi, coby se to jeszcze rozmyślił, ale łon sie uprził, bezto sułtan doł mu to, co chcioł! Kozoł go zawrzić do wielkij izby, kaj było kupa jodła, yno że wszystek było zrobione ze chałwy. Po poru dniach synek prosił ło konsek czornego chleba! Do dzisioj to pamiyntom!
Moja oma piykła siedym wielgich, łokrongłych pecynkow roz we tydniu, bo musiała. Myszkali we fesztrowni, a do nojbliższej wsi było pora kilometrow bez las, abo ze drugij strony – bez łonki, ale tam było jeszcze dalij.
Kiejś mieli we chałpach piekaroki, abo tak, jak moja starka, niyśli chlyb do piekorza. Jo żech se tyż niydowno taki chlyb narychtowała, ale mi sie niy udarził, źle sie wypiyk a mioł zakalec! Ujek Bynek, co cołki lata robił za piekorza, padoł mi, że w naszych piekarnikach je za mały hajc, bezto sie chleby niy darzom. Padałach se, że zaniesa chlyb do piekorza tak jak starka, ale dobrze, że poszłach sie nojprzod spytać, eli by mi go upiykł. Piekorz sie sy mie wyśmioł! Padoł, że chleby sie teroz cołkiym inaczyj piecze, a jak chca, to łon mi może dać jedyn chlyb za darmo, cobych mu... niy zawracała! Poszłach sie poużalać kamratce, a łona mi padała, że już dość pora lot piecze chlyb w doma, bo kupiła se taki automat, a dała mi krajiczek sprobować. Niy powiym – dobry, ale taki, jak łod mojij starki niy był!
Niy dali jak wczora puściłach se radio, a tam słysza, jak chop, co mo restauracyjo, godo ło tym, jaki interes robi na kanapkach na wynos. Dowiedziałach sie, że krajiczki ze majonezom już niy som modne, a ło klapsznitach, co my dycki do roboty a do szkoły brali, to sie już spominać niy godzi, bo teroz se kanapki idzie zamówić bez telefon a prziwiezom wom je do dom abo do roboty.
Wkurziłach sie na tako godka! Narychtowałach se klapsznita a telach se do nij nakładła, że ledwiech jom ugryźć mogła!
Komentarze