Nowiny.Rybnik.pl › Po naszymu › Region › Wydanie: 2010/09 (2745)

Dziyń Teściowej

03-03-2010

Szczwortego marca przipado Dziyń Teściowej. Teściowo to je baba łod teścia. To sie łogromnie gupio słucho, jakby bez chopa nic niy znaczyła! U nos jeszcze nikerzi godajom szwigermutra, a na teścia – szwiger, ale nojlepij na tym wyszły te gizdy Francuzy, bo u nich teściowo nazywo sie „piykno matka”. Tako francusko teściowo to sie ni może na ziyncia łobrazić, choćby i nazdoł, bo i tak piyknie godo!
No, ale dość szpasow, sama żech tyż je szwigermutrom, ziyńcia jeszcze ni mom, ale mom synowo, cołkiym fajno dziołcha! Wiycie, że ludzie już zapomnieli, że na synowo my kiejś godali niywiasta? Słyszałach, jak jedyn uczony chop godoł, że to sie wykłodo po staropolsku jako „nieznana kobieta”, bo łona prziszła do rodziny, a żodyn jom tam niy zno, krom jejigo chopa.
Jo se myśla, że już teroz ni ma takich strasznych szwigermutrow, co nimi straszyli we ślonskich wicach, a jak jeszcze kaj som, to chneda zaginom, bo świat idzie do przodku! Teroz baby po wiynkszinie robiom we robotach, łobiadow ziyńcioszkom niy warzom, a dziecek niy bawiom, no chyba że som na pyndzyji a chcom swojim dzieckom pomoc! Teroz starzi łod młodych niy zależom, jak downi, bo pyndzyje majom, pryndzyj młodzi u łojcow we kapsie siedzom, niż sie sami dorobiom.
Ciynżko je być synowom, ale szwigermutrom tyż ni ma leko, sami to isto wiycie! Jo szwigermutra miała dobro, ale troszka nom to trwało, niż my sie dogodały, bo to ni ma tak łaps! Jakby łona mie wychowała, to by my sie lepi rozumiały, ale moja mamulka była pora lot młodszo, wiyncyj we państwowej robocie łotrzaskano, na tyn świat sie inaczy dziwała, a jo wiela po nij tyż wziyna. Jednako jak łobie strony tego chcom, to wszystek do sie zrobić. Moja starka dycki godała, że jak je zgoda, to sie dwoch na jednej słomce prześpi!
Jo żech se tyż porzad musiała przipominać ta staro mondrość, kiej mi sie coś ze poczontku niy widziało. Trzimom sie zasady, że do wychowanio dziecek sie młodym niy wstyrkom, bo jo to tyż ni miała rada, jak mi wszyjscy na łokoło dowali nauki, bo im sie zdało, że wiedzom lepij. Rady wysłuchałach, przemyślałach, ale robiłach po swojimu, bezto myśla, że synowo tyż tak może, i tu sie łobie zgodzomy!
Nojbardzij miło je mi na sercu we Dziyń Matki abo we moji urodziny! Krom gyszynkow dostana jeszcze dobre słowo, dziołcha, co żech jom pora lot nazod ani niy znała, niy powiy mi teściowo, ino mamo!

Ostatnie komentarze

Czytelnik2010-03-04 11:03:18
To som nojlepsze godki z
To som nojlepsze godki z cołki gazety

› zobacz wszystkie komentarze