Nowiny.Rybnik.pl › Po naszymu › Region › Wydanie: 2009/44 (2728)

Koniec gupoty

04-11-2009

Tak ze dwa tydnie nazod byłach we strzoda na torgu we Rybniku a potkałach tam kamratka ze szkolnej ławki, Trudka Hajniczka. Niy widziały my sie możnej ze dziesiyńć lot, bezto my se siadły we „makdonaldzie” na rynku a godały bez trzi godziny. Za tyn czos Trudka zjadła dwa „makcośtam”, no taki żymły z czymsikej we pojstrzodku, a jo wypiła dwa kubki tyngij kawy, bo jo je na diecie a ani żech niy pomyślała, że to może zaszkodzić na moji ciśniyni, dziepro cera mie shaltowała, jak po mie przijechała.
Bez cołki tyn czos Trudka uskargowała sie na swojigo chopa Wilusia: -Wiysz moj stary je taki szporobliwy, jak starzik Wiluś Kuderlik, co po nim mo miano, to je aż do niywytrzimanio! Tak ze miesionc nazod był we Żorach we „oszołomie”, bo padoł, ze łon wiyncyj a tonij nakupi niż jo. Ale łon tyż wiela niy nakupił za te sto złotych, co wzion, bo wszystek podrożało, ale przijechoł z innom brymzom. Kajś tam mierzili za darmo cholesterol, no to moj chopeczek stanoł se do raje a wyszło mu, że go mo dość sporo a miołby trzimać dyjeta. Już łod proga na mie wywstoł: -Bo ty yno te miyńsisko a masne jodło, a nom to szkodzi, nojwyższy czos, cobyś zaczła warzić leki łobiady.
Na drugi dziyń Trudka natarła kartofli a upiykła placki, ale Wilusiowi było po nich jakoś niy łonako, bezto padoł: - Lepij byś ryżu nawarziła z jakom jarzinom.
No to babeczka zrobiła jak chopeczek kozoł. Na łobiod była „chińszczyzna” ze ryżym, ale za godzina Wiluś był głodny a zły: -Taki jodło to je richtik dobre, ale do Chińczykow! – padoł. Potym bez dwa dni na łobiod był ajntopf, ale yno na porcji rosołowej ze kokotka, bezto Wilusiowi sie niy widzioł, a ze lodowki sie straciła nojprzod wyndzonka, potym kyjza a na koniec jajca.
Jak we piontek Trudka postawiła na stoł zimioki bez łomasty a ku tymu kiszka, chop niy wydzierżył: -Roztomiło babeczko, jo cie prosza naworz mi jutro żuru na wyndzonce a wuszcie, a we niydziela zrob prawy ślonski łobiod: zupa ze nudlami, guminiane kluski, modro kapusta a rolada... a do mie trzi rolady jako dycki!
– Momy jaki świynto? – niy poradziła sie nadziwić Trudka.
– Wiysz, babeczko, mosz prawie, to je wiyncyj jak świynto, bydymy fajrować koniec moji gupoty, bez te nowomodne jodła bych sie pryndzyj na kerchow wykludził, niż bez tyn cholesterol!