Roztomańte talynta

Dobrze mieć zamiłowani. Jo se tyż tak myśla, bo inaczy bych ani niy malowała, ani wom bojek niy pisała, ale niy starczy go mieć, trza go jeszcze flyjgować!
Tak przed połrokiym potkałach kamratka, co wele mie za młodu miyszkała. Już pora miesiyncy była na pynzyji, a strasznie sie i ckniło za robotom. Lamyntowała, że w doma porzond siedzi sama a ni mo do kogo gymby łodewrzić. Padałach i, coby sie wziena za jako miło sercu robota, ale łona mi łodpedziała: – Powiydz sama, co jo takigo mom robić? Mój chop stowo ło szostej, bo jeszcze troszka przirobio, jymy śniodani, potym jo łoporzodzom pomiyszkani a co drugi dziyń ida do sklepu na łosiedlu. Na zrobiyni łobiadu starczo mi godzina, a co potym robić bez cołki popołednie? Mój stary, jak przidzie ze roboty, to lygo na zofa i czyto gazety, a wiela razy przi nich uśnie! A powiydz mi jeszcze: wiela to idzie jeździć do dziecek, a siedzieć im na karku? To jo ni mom rada! Ty to co inszego, ty mosz talynty, a jo? Szkoda godać!
– Co jo pamiyntom, to ty żeś miała wielgi talynt a grajfka do pieczynio, pamiyntosz, jak my uratowały ta spolono dorta, co miała być na Janczyno łosiymnostka? – przipomniałach.
– Ty mosz prawie, to bych jeszcze poradziła...
Kamratka wziyna sie do roboty a teroz sie łod ludzi obegnać niy może, bo rychtik dobre dorty piecze a nowe ciasta wynokwio. Baba je jak niy ta sama, teroz ani ni mo czasu pogodać bez telefon, a widzymy sie roz za ruski rok!
Niy myślcie se, że yno baby majom talynty roztomańte, chopy tyż!
Jedyn taki moj znajomy za młodu rod malowoł obrozki, ale to pociep, wiadomo, życi czasym człowieka zmusi, coby na ziym śloz! Teroz mioł jednako ciynżko sie do tego nazod zastrojić, sztyjc mu coś przeszkodzało, ale jego dziecka mu kupiły na Mikołaja wszystko, co potrzebowoł do malowanio.Chop zasztartowoł, a maluje do dzisioj. Porzond jeszcze szuko swoji drogi, ale jo je dobrej myśli a wiym, że jom na isto znojdzie!
Jo u sie łostatnio bez przipadek tyż jeszcze jedyn nowy talynt znodła! Zepsuło nom sie radio, a tak bez muzyki było mi troszka niy łonako, ale chnet, żech se spomniała, że za bajtla jo rada śpiywała ze starkom: – Przeca jo te wszystki pieśniczki znom a pamiyntom. No i zaśpiywałach, ale zaroz żech na to prziszła, co miała bych to robić yno w tyn czos, jak jo je sama w doma. Wiym, że strasznie fałszuja, ale, co se byda żałować, jak jo to mom rada!
Wy się tyż podziwejcie na swoji życi a chnet uwidzicie, że mocie wiela talyntów, co ło nich ani niy wiycie.