Spotkanie czelodkowe

„Czelodka po naszymu” sie rozrosto. Co roku po konkursie „Po naszymu, czyli po ślonsku” przibywo nojmynij sztyrech członkow, bo tela dycko jest laureatow. Trzech z kategorie dorosłych, a jedyn z młodzieżowyj. Co roku tyż spotykomy sie przeważnie w okresie przed abo po Godnich Świyntach.
Latoś trefiyło sie spotkać trzinostego stycznia, a zorganizowała to Ślonzoczka Roku 2000 Maria Duńska z Katowic.
Zaczła sie ta Ślonsko Wilijo mszom o drugij po połedniu w kościele Najświyntszego Ciała i Krwi Chrystusa w Katowicach Piotrowicach. Mszo była w intyncji synator Marii Pańczyk i wszystkich uczestnikow tego ślonskigo konkursu, a celebrowoł jom farorz Buchalik, kery z Boguszowic pochodzi. Piyknie śpiywoł kolyndy chor z tego kościoła, a po mszy przijechoł arcybiskup Damian Zimoń i tyż wysłuchali my jego krotkigo kozanio o naszym wkładzie w rozwoj kultury ślonskij.
Po mszy pojechali my do piyknie przistrojonyj na te nasze spotkanie restauracyje Vena w Katowicach Piotrowicach.
Niy byda wom pisoł, co tam były za ważne persony zaproszone z rostolicznych urzyndow, bo tych dycko niy brakuje na takich spotkaniach.
Stoły były prziszykowane jak na wielki świynto i niczego nom niy brakowało. Najważniejsze, że było taki rychtyk ślonski jodło wilijne, jak pieczony kaper, kapusta z grzibami, makowki i kompot z pieczek.
Zanim jednak sie zaczło te wspolne wilijowanie, wystympami bawiły nas dzieci z miejscowyj szkołki. Taki fajne miały przirychtowane jasełka, że nadziwić my sie niy poradziyli. Poprzeblykane za pastuszkow, aniołkow, diobołkow i herodow śpiywały jakiś mało znane kolyndy, a miyndzy tym godały piykne wierszyki o świyntyj rodzinie. Aże sie wierzić niy chciało, żeby taki małe bajtliki ze szkołki umiały zapamiyntać taki długi teksty i żodne sie niy pomyliło. Zdolne tyż widać som te przedszkolanki w Piotrowicach, a te dziecka jeszcze zdolniyjsze.
Jak dycko na tych pokonkursowych spotkaniach prezyntujom sie ci najnowsi laureaci. Przeca sie muszom jakoś do tyj „Czelodki” wkupić, to tyż kożdy musioł coś po naszymu do cedzitka pogodać. Nojprzod pogodoł Ślonzok Roku 2007 Norbet Klosa, potym sie przedstawiyły dwie laureatki drugigo i trzecigo miejsca. Nojlepij jednak poradziył godać po naszymu tyn najmłodszy laureat Robert Poloczek z Żedowic. Tak piyknie godoł, że ci starzi według mojigo zdanio tak niy poradziyli, to tyż niy dziwota, że sie spodoboło te jego godanie członkom jury i prziznali mu piyrsze miejsce.
Jak dycko niy brakowało tyż i teraz zespołu Familijo ze Skrzyszowa, kerzi nom tyż pośpiywali piyknie pora kolynd.
Piyknie było i szkoda, że sie to skończyło. Spotkomy sie juzaś na bezrok.

A na fotce widzicie laureatka z 1999 roku Marta Twardzik z Jaśkowic i młodzieżowo Ślonzoczka Roku 2005 Dominika Drob z Tychow.