Przepowiedziny

– No i podziwej sie Stanik, łostoł żech już prastarzikiym. Ta najstarszo wnuczka, kero sie wydowała po Wielkanocy, w niydziela urodziyła piykno i zdrowo dziołszka. Na miano bydzie miała Oliwka, bo teraz przeważnie tak dowajom dziołchom. Przedstow se jednak, że mioł sie urodzić synek i już od września wszystko kupowali w modrym kolorze, niby do synka, bo dochtory uznali na tych komputerach i inkszych fizymatyntach, że to bydzie synek.
Jednak chocioż tako technika dzisioj majom, wyszło inaczyj, ale jo je rod, bo tyż mieli miano obrane do synka, kere mi nijak niy pasuje do naszych ślonskich mian. Olivier sie mioł nazywać, no ale wyszła Oliwka, to już mi bardzij pasuje na swojski. No bo jak by te miano zdrobniać, to bydom jom wołać Liwka i to mi przipomino małe pilynta, bo dycko sie na nie wołało: liwa! liwa! liwa!
– Ale tyś je prastarzik, do pilynta swoja prawnuczka porownać ni ma cie gańba?
Ani tego głośno niy godej przed twojom starom, bo cie objedzie.
Ale co do tych przepowiedzin, to mosz recht, mylom sie te dochtory czynsto. Piyrwyj to tyż dycko sie nojprzod przepowiadało, co tyż ta Lynka abo Angela urodzi. Była u nas na wsi tako przepowiadaczka, kero dycko umiała zgodnyć i nigdy sie niy pomyliła, co sie urodzi. Za darmo jednak tego niy robiyła i ci, co byli ciekawi, musieli za to płacić. Dopiyro jedyn młody żyniok jom kapnył, jak łona to przepowiado i skończyło sie te cygaństwo. Bo podziwej sie, jak kery prziszoł do nij po te przepowiedziny, to łona godała, co sie urodzi, i zapisowała se to w kalyndorzu. Yno jak pedziała, że bydzie synek, to w tym kalyndorzu napisała cera. Jak sie urodziyło to, co łona pedziała, to żodyn niy prziszoł, a jak niy zgodła i kery prziszoł z reklamacjom, brała kalyndorz i pokazuje czorne na biołym, że jest napisane tak jak wywrożyła. Tyn jedyn żyniok, coch ci padoł, jednak niy doł sie wykiwać, bo tyż se to zapisoł w swojim kalyndorzu i żodyn już i zarobić niy doł.
– No ja, ale piyrwyj były tyż modne taki przepowiedziny już po urodzyniu dziecka i w to sie fest wierziło. Godało sie, że dziecko urodzone w niydziela bydzie miało szczyńści w życiu. Jak sie urodziyło w sobota, to bydzie fest robotne i dbałe o porzondek i czystość. Zaś niy dej Boże żeby sie w piontek urodziyło, bo to przepowiadało usmolone życie. Miesionce tyż były ważne i taki najgorszy miesionc to liczyli marzec. Godali wtedy na taki dziecko marcowy cieliczek, że bydzie słabe i niyodporne na rostomajnte choroby. Zaś najszczyńśliwsze dziecko było taki, co było błanom obciongnyte, godali, że sie w czepcu urodziyło.
– Dobrze, że już dzisioj ci młodzi niy bierom se tych przepowiedzin za bardzo do serca, bo najważniejsze, że sie dziecko zdrowe urodzi i dobrze sie bydzie chowało.