Kole kumina

– Ale żeś sie spodoboł Hajnel tymu mojimu Karliczkowi, wczoraj żech tam był zajrzeć, to sie cołki czas o cia pytoł. Obiecoł żech mu, że zaś cie przikludza, to mu połosprowiosz o tym naszym bonkrze przi glinioku.
– No dyć żech mu som obiecoł, ale widzisz ta moja sie ubzdurała prawie wczoraj ogorki kisić, bo dostała od somsiadki cołki kibel, ale kopru ni miała i musioł żech na torg iść. Musza ci pedzieć, że som koper kupić to ni ma tak łaps, handlyry mie posyłały tam, kaj żech ogorki kupiył, bo majom yno dlo tych, co u nich kupujom.
– Toż dzisioj chyba mosz fraj? Poszli by my zajrzeć, czy tyn harypilow kumin już odnowiyli, bo tam jakiś rysztonki stoły zeszły tydziyń.
– Jo tyż jest ciekawy, bo downo żech niy zaglondoł na tyn plac Wolności. Ostatni roz żech tam był u golacza, to prawie próbowali woda puszczać w tym kaczoku. Taki talyrze tam som nastawiane i po nich sie ta woda leje. Już żech tam bez te ostatni hyca chcioł iść szłapy zatoplać.
– Niy godej mi tu gupot, bo by cie za iptusia uznali i straż miejsko by cie zaroz do ansztaldu odwiozła. No ale to wcale ni ma taki gupie, bo roz pokazowali, jak w Rzymie sie ludzie chłodzom we fontannie, to byś możno nowo moda w Rybniku pokozoł. Toż podź idymy tam zajrzeć.
– Podziwej sie Stanik, te pierony cołki tyn kumin rysztonkiym obstawiyli i durch zadekowali, ale niy widać tam żodnego.
– No rychtyk, jak żech go tydziyń tymu widzioł, tak dalij wyglondo, ale mi się zdo jedna raja cegieł z wiyrchu brakuje, możno go bydom skrocać. Harypil by im doł, skrocać, keby tak yno poradziył stanyć z grobu. Dyć wiela niy brakowało, to by go rozebrali i wcale by browarskigo kumina niy było, bo pisali już w jakimś cajtongu, że sie rozlatuje. Nawet znojdli jakigoś, co tu kajś blisko miyszko, kery to przituplikowoł, ale na isto to rybniczan niy był, bo by tak gupie niy fuloł. Fajnie by było, kejby napisali na tym kuminie z wiyrchu na doł „HARYPIL” na pamiontka tego rybnickigo elwra.
– No i na wiyrchu by postawiyli tako figura Harypila, jak robi handsztand, trza by im podpedzieć. Podź se Stanik siednymy tam przi tyj małyj fontannie przi schodach do tyjatru, bo widza, że tam woda leci, a tukej tyn kaczok z talyrzami jest durch suchy, możno im to nawaliło abo wody brakło w kokotku.
– Ja, tukej by szło posiedzieć, fajnie to porobiyli pra? Coroz fajniejszy tyn nasz Rybnik, ale z tego miejsca to kumina wcale niy widać. Tyn bonker, kery tam za nim stoji, to durch go połknył, przeca browar był wysoki, ale kumin go oksztołciył. Ponboczku, tela tego betonu, wiela by to chałup szło wystawić.
– A dziwej sie teraz po lewyj stronie te pawilony, niy zdo ci sie, że łone zawodzajom i psujom widok tym, co postawiyli tyn wielki bonker. Teraz mi sie zdo, że tyn gaz naschwalnie tam wybuchnył, ale trocha za słabo i niy udało sie tych sklepikorzy tam wysobarzić.
– Ale Hajnel, ty już inkszy niy bydziesz, ani tego głośno niy godej, bo jakby cie usłyszeli, to cie jeszcze po sondach mogom posmykać.